សារប្រធានក្រុមប្រឹក្សាបរធនបាល

មន្ទីរពេទ្យគន្ធបុប្ផា ជាមន្ទីរពេទ្យកុមារថ្នាក់ជាតិដ៏ធំបំផុតនៅកម្ពុជា ដែលទទួលការពិនិត្យ និងព្យាបាលកុមាររាប់លានករណីក្នុងមួយឆ្នាំៗ ប្រកបដោយគុណភាព ដោយមិនគិតថ្លៃ និងមិនមានការរើសអើង ដែលនេះជាផ្នែកដ៏សំខាន់មួយនៃការផ្ដល់ការថែទាំសុខុមាលភាពទារក និងកុមារ និងកាត់បន្ថយចំណាយចេញពីហោប៉ៅផ្ទាល់ខ្លួនក្នុងការទទួលបានសេវាថែទាំសុខភាព។ មន្ទីរពេទ្យនេះ អាចដំណើរការទៅបានដោយរលូន និងមានប្រសិទ្ធភាពខ្ពស់រហូតដល់ពេលនេះ និងទៅអនាគត អាស្រ័យលើការចូលរួមបរិច្ចាគ និងវិភាគទានដែលមិនអាចខ្វះបានពីប្រភពស្របច្បាប់នានា រួមមានរាជរដ្ឋាភិបាលកម្ពុជា, ក្រសួង-ស្ថាប័នពាក់ព័ន្ធ, ក្រុមហ៊ុនឯកជន, និងសប្បុរសជនទាំងក្នុង និងក្រៅប្រទេស។ ឆ្លៀតក្នុងឱកាសនេះ, ខ្ញុំសូមសម្ដែងនូវការកោតសរសើរ និងថ្លែងអំណរគុណយ៉ាងជ្រាលជ្រៅជូន សម្តេច, ឯកឧត្តម, លោកជំទាវ, អ្នកឧកញ៉ា, ឧកញ៉ា, លោក, លោកស្រីជាសប្បុរសជនទាំងអស់ដែលបានបន្តចូលរួមបរិច្ចាគជូនមូលនិធិគន្ធបុប្ផាកម្ពុជា ជាពិសេសខ្ញុំសូមអរគុណថ្នាក់ដឹកនាំ និងមន្រ្តីក្រោមឱវាទនៃក្រសួង-ស្ថាប័ន និងរដ្ឋបាលរាជធានី ខេត្ត ព្រមទាំងក្រុមហ៊ុន-សហគ្រាសឯកជនធំៗ ដែលបានចូលរួមបង្កើតគណៈកម្មការទ្រទ្រង់មូលនិធិគន្ធបុប្ផាកម្ពុជា ស្របតាមការជូនដំណឹងរបស់រាជរដ្ឋាភិបាលកម្ពុជា ដើម្បីបង្កើនការផ្សព្វផ្សាយ និងកៀរគរថវិការបរិច្ចាគដោយស្ម័គ្រចិត្ត ជាប្រចាំឆ្នាំ និងទៀងទាត់។ ជាមួយគ្នានេះ ខ្ញុំសូមបន្តលើកទឹកចិត្តឱ្យមានការចូលរួមបរិច្ចាគឱ្យកាន់តែសកម្មថែមទៀត ក្នុងស្មារតី “ខ្មែរជួយខ្មែរ” ដោយខ្លួនឯង ដើម្បីភាពញញឹមរបស់កុមារ ដែលជាអនាគតដ៏ភ្លឺស្វាងរបស់កម្ពុជា។